បទ​សម្ភាសន៍ - វីអូអេ

រដ្ឋបាលប្រធានាធិបតីអាមេរិកលោក Donald Trump បាននិងកំពុងបន្តរៀបចំនីតិវិធីដាក់ទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ ហៅកាត់ថា USAID ឲ្យស្ថិតនៅក្រោមការគ្រប់គ្រងរបស់ក្រសួងការបរទេសអាមេរិក។ ការរៀបចំនេះបានបង្កជាក្តីបារម្ភចំពោះលទ្ធភាពនៃការទទួលបានជំនួយសម្រាប់ប្រទេសកំពុងអភិវឌ្ឍន៍ដូចជាកម្ពុជា។ លោក ហ៊ុល រស្មី អ្នកយកព័ត៌មានឲ្យវីអូអេ បានសម្ភាសន៍លោក ឃុន ថារ៉ូ ប្រធានកម្មវិធីការងារនៃអង្គការសង់ត្រាល់ អំពីស្ថានការណ៍ចុងក្រោយពាក់ព័ន្ធនឹងទីភ្នាក់ងារមួយនេះ និងផលប៉ះពាល់ដែលអាចកើតមានលើអង្គការសង្គមស៊ីវិលជាច្រើននៅកម្ពុជា។ សូមលោកអ្នកនាងស្តាប់បទសម្ភាសរវាងលោកហ៊ុល រស្មី អ្នកយកព័ត៌មានឲ្យវីអូអេ និងលោក ឃុន ថារ៉ូ៕

ប្រទេសជាច្រើននៅលើពិភពលោក រួមទាំងកម្ពុជាផង តែងប្រារព្ធទិវាសុវត្ថិភាពអ៊ីនធឺណិតនៅរៀងរាល់ដើមខែកុម្ភៈ ដើម្បីជំរុញឱ្យមានការយល់ដឹងអំពីសុវត្ថិភាពនៃការប្រើប្រាស់អ៊ីនធឺណិត ជាពិសេសសម្រាប់កុមារនិងយុវជន។ លោក ហុង រស្មី នាយកអង្គការ Save the Children ប្រចាំកម្ពុជា ដែលនឹងចូលរួមក្នុងការប្រារព្ធទិវានេះ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកយកព័ត៌មានឱ្យវីអូអេថា ការផ្សព្វផ្សាយអំពីការប្រើប្រាស់អ៊ីនធឺណិតដោយត្រឹមត្រូវកាន់តែច្រើន នឹងជួយឱ្យកុមារនិងយុវជនកាន់តែមានសុវត្ថិភាពនៅក្នុងការប្រើប្រាស់៕

ក្រៅពី​អង្គការ​សង្គម​ស៊ីវិល ផ្នែក​ខ្លះ​នៃ​វិស័យ​សុខាភិបាល​របស់​កម្ពុជា ជាពិសេស​ការប្រយុទ្ធ​ប្រឆាំង​នឹង​ជំងឺ​គ្រុន​ចាញ់ អាច​នឹង​រង​ផល​ប៉ះពាល់​ពី​ការ​បង្កក​ជំនួយ​បរទេស​របស់​សហរដ្ឋអាមេរិកដែល​រដ្ឋបាល​របស់​ប្រធានាធិបតី​អាមេរិក​លោក ដូណាល់ ត្រាំ (Donald Trump) បាន​សម្រេច​ធ្វើឡើង​រយៈពេល ៩០ ថ្ងៃ។ លោក​វេជ្ជបណ្ឌិត ហ៊ុយ រ៉េកុល ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺ​គ្រុន​ចាញ់ ប៉ារ៉ាស៊ីតសាស្ត្រ​ និង​បាណកសាស្ត្រ​នៃ​ក្រសួង​សុខាភិបាល ប្រាប់​វីអូអេ​ថា ​មន្រ្តី​ពាក់ព័ន្ធ​«កំពុង​អន្ទះ​អន្ទែង​ស្វែង​រក»កិច្ច​សហប្រតិបត្តិ​ការ​ជាមួយ​ដៃ​គូ​ពាក់​ព័ន្ធ​ជំនួស​នា​ពេល​នេះ។ ទោះជាយ៉ាងណាក្តី លោក​ក៏​បង្ហាញ​ក្តី​សង្ឃឹម​យ៉ាង​មុតមាំ​ថា សហរដ្ឋ​អាមេរិក​អាចនឹង​ផ្តល់​ជំនួយ​ឡើង​វិញក្នុង​ពេល​ឆាប់ៗ​នេះ។ តទៅនេះ​ជា​បទសម្ភាសន៍​រវាង​លោក ស៊ុន ណារិន អ្នក​យក​ព័ត៌មាន​ឲ្យ​វីអេអូ​ប្រចាំ​រាជធានី​ភ្នំពេញ ជាមួយ​លោក​វេជ្ជបណ្ឌិត ហ៊ុយ រ៉េកុល៕

កិច្ចការរបស់អង្គការក្រៅរដ្ឋាភិបាល និងសង្គមស៊ីវិលជាច្រើននៅជុំវិញពិភពលោក ក្នុងនោះរួមមានអង្គការជនពិការនៅកម្ពុជា កំពុងរងផលប៉ះពាល់ បន្ទាប់ពីប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បានប្រកាសបង្កកជំនួយបរទេសរបស់អាមេរិករយៈពេល ៩០ ថ្ងៃ។ ទោះជាព្រួយបារម្ភយ៉ាងណាក្តី អ្នកស្រី ម៉ាក់ ម៉ូនីកា នាយិកាប្រតិបត្តិនៃអង្គការជនពិការកម្ពុជា (CDPO) នៅតែបង្ហាញសុទិដ្ឋនិយមថា សហរដ្ឋអាមេរិកដែលជាប្រទេសមហាអំណាចមួយ អាចពិចារណាផ្តល់ជំនួយដល់អង្គការសង្គមស៊ីវិលនៅកម្ពុជា ដើម្បីអាចឲ្យអង្គការរបស់អ្នកស្រីដំណើរការគម្រោងសំខាន់ៗដែលកំពុងជួយដល់ជនមានពិការភាពក្នុងប្រទេសកម្ពុជា។ សូមអស់លោកអ្នកនាងស្តាប់បទសម្ភាសន៍រវាងលោក ស៊ុន ណារិន អ្នកយកព័ត៌មានឲ្យវីអូអេនិងអ្នកស្រី ម៉ាក់ ម៉ូនីកា ដូចតទៅ៕

ស្របពេលដែលកម្ពុជាកំពុងត្រៀមខ្លួនចាកចេញពីលំដាប់ប្រទេសដែលមានប្រាក់ចំណូលមធ្យមកម្រិតទាប ទៅកាន់លំដាប់ប្រទេសដែលមានប្រាក់ចំណូលមធ្យមកម្រិតខ្ពស់ នៅត្រឹមឆ្នាំ ២០៣០ អ្នកជំនាញផ្នែកការងារលើកឡើងថា កម្មករកម្មការិនីរាប់សែននាក់ដែលកំពុងធ្វើការងារតាមបណ្តារោងចក្រក្នុងប្រទេសកម្ពុជានៅតែបន្តប្រឈមនឹងបញ្ហាប្រាក់ឈ្នួលទាប កង្វះការគាំពារសង្គម និងបញ្ហាផ្សេងៗទៀត។ លោក ឃុន ថារ៉ូ ប្រធានកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានឲ្យវីអូអេថា កម្ពុជាអាចក្លាយជាប្រទេសមានប្រាក់ចំណូលមធ្យមកម្រិតខ្ពស់ដោយមិនមានឧបសគ្គ លុះត្រាតែស្ថានភាពសេដ្ឋកិច្ចរបស់កម្មករនិយោជិតមានភាពប្រសើរឡើង៕

ក្រុមប្រឹក្សា​យុវជន​ឯកអគ្គរដ្ឋទូត​សហរដ្ឋអាមេរិក (AYC) គឺជា​ផ្នែកមួយ​នៃ​គំនិត​ផ្តួចផ្តើម​ជា​សាកលរបស់​ស្ថានទូត​សហរដ្ឋ​អាមេរិក​ទូទាំង​ពិភពលោក។ នៅ​កម្ពុជា ក្រុមប្រឹក្សានេះ​ត្រូវ​បាន​បង្កើតឡើង​តាំងពី​ឆ្នាំ២០១២ ហើយ​ជារឿយៗតែងមាន​សកម្មភាព​នានា​ពាក់ព័ន្ធនឹង​យុវជន។ កញ្ញា សុខ សោភា ប្រធាន​ក្រុម​ប្រឹក្សា​យុវជន​ឯកអគ្គរដ្ឋទូត​សហរដ្ឋ​អាមេរិក (AYC) ជំនាន់​ទី១៣ លើក​ឡើង​ក្នុង​បទសម្ភាសន៍​ជាមួយ​អ្នកនាង កាន់ វិច្ឆិកា អ្នកយកព័ត៌មាន​ឱ្យ​វីអូអេ​ថា ក្រុមប្រឹក្សា​យុវជន​ឯកអគ្គរដ្ឋទូត​សហរដ្ឋ​អាមេរិក (AYC) ជួយ​លើក​កម្ពស់​ការអប់រំ និង​ភាពជា​អ្នកដឹកនាំ​របស់​យុវជន និង​បង្កើន​ទំនាក់ទំនង​រវាង​កម្ពុជា និង​សហរដ្ឋ​អាមេរិក៕

ពលករកម្ពុជាដែលកំពុងរស់នៅ និងធ្វើការក្នុងប្រទេសថៃដោយមានឯកសារមានចំនួនជាង ១ លាននាក់។ បើតាមក្រសួងការងារកម្ពុជា រដ្ឋាភិបាលថៃបានសម្រេចអនុញ្ញាតឲ្យពលករខ្មែរបន្តបណ្ណអនុញ្ញាតការងារ និងការស្នាក់នៅសម្រាប់ពលករខ្មែរដែលមានទិដ្ឋាការស្នាក់នៅផុតសុពលភាពនៅថ្ងៃទី ២៣ ខែកុម្ភៈ ឆ្នាំ ២០២៥ ក្នុងរយៈពេល ២ ឆ្នាំបន្តទៀត។ លោក លឹង សុផុន មន្ត្រីគម្រោងពលករចំណាកស្រុកនិងជាក្រុមការងារមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា ពលករខ្មែរប្រមាណជា ៦ សែននាក់ កំពុងស្នើបន្តបណ្ណអនុញ្ញាតការងារនិងស្នាក់នៅក្នុងប្រទេសថៃនេះ ខណៈលោកបារម្ភថា ពលករអាចទទួលរងការឆបោកពីមេខ្យល់ជុំវិញការរៀបចំឯកសារ៕

គម្រោង Sustainable Design 11 ឬ SD11 ត្រូវបានបង្កើតឡើងកាលពីចុងឆ្នាំ ២០១៩ ដោយក្រុមយុវជនមួយដើម្បីចែករំលែក បណ្តុះបណ្តាល និងដឹកនាំយុវជនឲ្យចាប់អារម្មណ៍លើការអភិឌ្ឍទីក្រុងដែលមានតុល្យភាពសង្គម សេដ្ឋកិច្ច និងបរិស្ថានប្រកបដោយនិរន្តរភាព ស្របតាមគោលដៅអភិវឌ្ឍន៍ប្រកបដោយចីរភាពទី ១១ របស់មហាសន្និបាតអង្គការសហប្រជាជាតិ។ លោក សឿន វឌ្ឍនៈ ស្ថាបនិកគម្រោង Sustainable Design 11 លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកយកព័ត៌មានឲ្យវីអូអេថា គម្រោង SD11 ជំរុញយុវជនកម្ពុជាឲ្យយកចិត្តទុកដាក់លើការអភិវឌ្ឍទីក្រុងប្រកបដោយចីរភាព៕

ប្រធានាធិបតី​កូរ៉េខាងត្បូង​លោក Yoon Suk Yeol បាន​ប្រកាស​កាលពី​យប់​ថ្ងៃអង្គារ​ប្រើ​ច្បាប់​អាជ្ញាសឹក ប៉ុន្តែ​បាន​ដក​វិញ​ប៉ុន្មាន​ម៉ោង​ក្រោយ​ពី​សភា​ជាតិ​បាន​បោះឆ្នោត​ប្រឆាំង។ លោក លួន វិបុល ប្រធាន​សមាគម​ប្រជាធិបតេយ្យ​ខ្មែរ​ក្វាងជូ​បាន​ចែក​រំលែក​ការវិភាគ​របស់​លោក​អំពី​ការប្រកាស​ដ៏គួរ​ឱ្យ​ភ្ញាក់ផ្អើល​នៃ​ច្បាប់​អាជ្ញាសឹក​នៅ​ប្រទេស​កូរ៉េ​ខាងត្បូង។ ក្នុង​នាម​ជា​សកម្មជន​សង្គម​ខ្មែរ​ លោក វិបុល បាន​សម្តែង​ការ​ភ្ញាក់ផ្អើល​ដែល​ប្រទេស​ប្រជាធិបតេយ្យ​ដូច​កូរ៉េ​ខាង​ត្បូងបាន​ឈាន​ដល់វិធានការ​បែប​នេះ។ យ៉ាង​ណា​ក៏​ដោយ លោក​បាន​កោត​សរសើរ​សមាជិក​សភា​ និង​កង​កម្លាំង​ប្រដាប់​អាវុធ​ដែល​បាន​ឈរ​ជា​មួយ​ប្រជាពលរដ្ឋ​និង​លើក​ដម្កើង​លទ្ធិ​ប្រជាធិបតេយ្យ។ សូម​លោក​អ្នកស្តាប់​បទសម្ភាសន៍​របស់​លោក ម៉ែន គឹមសេង នៃ​វីអូអេ​ជាមួយ​នឹងលោក លួន វិបុល លើ​ការវិវឌ្ឍន៍​ដ៏​សំខាន់​នេះ និង​ផលប៉ះពាល់​ចំពោះ​អនាគត​របស់​ប្រទេស​កូរ៉េ​ខាងត្បូង៕

អ្នកការពារសិទ្ធិពលករចំណាកស្រុកមើលឃើញថា ថ្នាក់ដឹកនាំប្រទេសថៃដែលទើបឡើងកាន់អំណាចរបស់លោកស្រី ផេថោងថាន ស៊ីណាវ៉ាត់ នៅមិនទាន់មានគោលនយោបាយអ្វីប្រសើរសម្រាប់ពលករចំណាកស្រុកដែលកំពុងធ្វើការនៅប្រទេសថៃនៅឡើយ។ លោក ឌី ថេហូយ៉ា ប្រធានផ្នែកប្រឆាំងការជួញដូរមនុស្ស និងទេសន្តរប្រវេសន៍នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា ពលករចំណាកស្រុកកម្ពុជាជាច្រើនដែលកំពុងធ្វើការនៅប្រទេសថៃ កំពុងប្រឈមនឹងបញ្ហាបន្ថែមទៀត ពាក់ព័ន្ធនឹងការបន្តសុពលភាពសៀវភៅការងារ៕

«ស្វ័យវិជ្ជាអក្ខរកម្មមេឌា» លើបណ្តាញសង្គមតេឡេក្រាម ជាប្រព័ន្ធផ្ញើសារស្វ័យប្រវត្តិដើម្បីស្វែងយល់ពីអក្ខរកម្មប្រព័ន្ធផ្សព្វផ្សាយនិងព័ត៌មាន។ ប្រព័ន្ធនេះត្រូវបានអភិវឌ្ឍឡើង ដើម្បីលើកកម្ពស់កម្មវិធីស្វ័យសិក្សាអំពីចំណេះដឹងស្ដីពីអក្ខរកម្មប្រព័ន្ធផ្សព្វផ្សាយ និងព័ត៌មាន លើកកម្ពស់កម្មវិធីអប់រំបែបឌីជីថល កសាងជំនាញភាពជាពលរដ្ឋឌីជីថល និងជាជំនួយសម្រាប់គ្រូបង្រៀនក្នុងការលើកកម្ពស់ការចូលរួមរបស់សិស្សក្នុងកម្មវិធីសិក្សាប្រកបដោយប្រសិទ្ធភាព។ លោកស្រី អ៊ិត ចណ្ណា អនុប្រធានការិយាល័យនាយកដ្ឋានបរិវត្តកម្មឌីជីថល លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកយកព័ត៌មានឱ្យវីអូអេថា ប្រព័ន្ធតេឡេក្រាម «ស្វ័យវិជ្ជាអក្ខរកម្មមេឌា» អាចជួយទប់ស្កាត់ការបោកបញ្ឆោតពលរដ្ឋពីការផ្សព្វផ្សាយព័ត៌មានមិនពិត៕

ការតស៊ូមោះមុត ភាពក្លាហានមិនចុះចាញ់ និងការជឿជាក់លើខ្លួនឯងបាន​ជួយជំរុញឲ្យលោកស្រី ខៃ ចិន្តា ក្លាយជាសហគ្រិនស្រ្តីលេចធ្លោម្នាក់ក្នុងវិស័យអេកូទេសចរណ៍។ លើសពីនេះទៅទៀត លោកស្រីបានដឹកនាំជួយអភិរក្សសត្វដំរីផងដែរ។ លោកស្រី ខៃ ចិន្តា បានថ្លែងនៅក្នុងបទសម្ភាសន៍ជាមួយអ្នកស្រី ធីតា វីន អ្នកយកពត៌មានឱ្យវីអូអេថា ស្រ្តីជាអ្នកដឹកនាំដែលមានការលះបង់ខ្ពស់ ចេះរៀបចំផែនការការងារឱ្យបានត្រឹមត្រូវ និងមានឆន្ទៈខ្ពស់ អាចឈានបានជោគជ័យក្នុងវិស័យការងារក្រៅផ្ទះ និងអាចជួយដល់ការជន្នះនឹងផ្នត់គំនិតចាស់បុរាណដែលមានមកលើស្ត្រីខ្មែរ៕

កាលពីខែសីហា ធនាគារអេស៊ីលីដាបានចុះអនុស្សរណៈនៃការយោគយល់ជាមួយក្រសួងការងារ ដោយផ្តល់ឥណទានរហូតដល់២០លានរៀលដល់ពលករដែលខ្វះធនធានហិរញ្ញវត្ថុសម្រាប់ចំណាយលើការចេញទៅបំពេញការងារនៅក្រៅប្រទេស ក្នុងអត្រាការប្រាក់ ៨.៥% ក្នុងមួយឆ្នាំ ដោយមិនតម្រូវឱ្យមានទ្រព្យធានា ប៉ុន្តែត្រូវមានកិច្ចសន្យាការងារជាមួយនិយោជកនៅក្រៅប្រទេស និងអ្នកចូលរួមខ្ចីដែលជាសមាជិកគ្រួសារ។ លោក ឃុន ថារ៉ូ ប្រធានកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា ឥណទាននេះអាចជួយសម្រាលបន្ទុកកម្ចីដែលមានអត្រាការប្រាក់ខ្ពស់ និងបង្កើនសុវត្ថិភាពការងារសម្រាប់ពលករបានមួយផ្នែក៕

អង្គការទិន្នន័យអំពីការអភិវឌ្ឍ ដែលជាភាសាអង់គ្លេស Open Development Cambodia ហៅកាត់ថា ODC បានប្រកាសឱ្យយុវជនដាក់ពាក្យចូលរួមកម្មវិធី «គម្រោងដឹកនាំដោយយុវជនឆ្នាំ ២០២៤» ក្នុងការរៀបចំគម្រោងដោយខ្លួនឯង ដើម្បីដុសខាត់ជំនាញ និងស្វែងរកឱកាសថ្មីៗ ក្នុងការអភិវឌ្ឍខ្លួន និងអាជីពនាពេលអនាគត។ លោក វេង សៀងហៃ អ្នកគ្រប់គ្រងកម្មវិធីនិពន្ធនៃអង្គការទិន្នន័យអំពីការអភិវឌ្ឍ ហៅកាត់ថា ODC លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកយកព័ត៌មានឱ្យវីអូអេថា យុវជនដែលចូលរួមក្នុង «គម្រោងដឹកនាំដោយយុវជនឆ្នាំ ២០២៤» នឹងទទួលបានចំណេះដឹងក្នុងការដឹកនាំតាមបែបប្រជាធិបតេយ្យ និងបរិយាបន្ន៕

សេចក្តីថ្លែងការណ៍អាស៊ានស្តីពីការដាក់ឱ្យមានការងារ និងការការពារពលករទេសន្តរប្រវេសន៍ផ្នែកនេសាទ ត្រូវបានបង្កើតឡើងកាលពីចុងឆ្នាំ ២០២៣ កន្លងទៅ។ គោលការណ៍ណែនាំអាស៊ានស្តីពីការងារ និងការការពារពលករទេសន្តរប្រវេសន៍ផ្នែកនេសាទកំពុងត្រូវបានពិភាក្សាពីអ្នកពាក់ព័ន្ធក្នុងបណ្តាប្រទេសនៅអាស៊ាន។ លោក Benjamin Harkins មន្រ្តីបចេ្ចកទេសកម្មវិធី សិទ្ធិពលករនសាទនៅអាស៊ីអាគ្នេយ៍ ការិយាល័យតំបន់អាស៊ី និងប៉ាស៊ីហ្វិកនៃអង្គការអន្តរជាតិខាងការងារ (ILO) លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា សេចក្តីថ្លែងការណ៍អាស៊ានស្តីពីការដាក់ឱ្យមានការងារ និងការការពារពលករទេសន្តរប្រវេសន៍ផ្នែកនេសាទនឹងអាចធ្វើឱ្យសុខុមាលភាព និងសិទ្ធិពលករផ្នែកនេសាទបានប្រសើរឡើង ប្រសិនបើរដ្ឋជាសមាជិកអាស៊ានប្តេជ្ញាក្នុងការអនុវត្ត៕

លោក  ខិន គិវ ជាកូនកំព្រាខ្មែរម្នាក់ដែលបានមកដល់សហរដ្ឋអាមេរិកដំបូងក្នុងឆ្នាំ១៩៨០ ក្នុងនាមជាជនភៀសខ្លួន។ ក្រោយពីការតស៊ូជម្នះឧបសគ្គរាប់មិនអស់ក្នុងជីវិតលើទឹកដីថ្មីអស់ពេលជាង២០ឆ្នាំមក លោកបានក្លាយជាអ្នកឯកទេសនិងគ្រូបង្រៀនខាងបច្ចេកវិទ្យាព័ត៌មាននៅមហាវិទ្យាល័យ Montgomery College ក្នុងរដ្ឋ Maryland។ នៅក្នុងបទសម្ភាសន៍ជាមួយលោក សាយ មុន្នី នៃវីអូអេ កាលពីពេលកន្លងទៅនេះ លោក ខិន គិវ បានថ្លែងថា លោកនៅតែបន្តបង្រៀននិងថែមទាំងឆ្លៀតពេលស្ម័គ្រចិត្តជួយសហគមន៍ខ្មែរក្នុងតំបន់ជុំវិញរដ្ឋធានីវ៉ាស៊ីនតោន ដើម្បីតបស្នងនិងជាការដឹងគុណដល់អ្នកដែលបានជួយជ្រោមជ្រែងលោកផងដែរ៕

អតីតជនភៀសខ្លួនខ្មែរម្នាក់គឺលោក តាន់ សុខ បានកែខៃជីវិតខ្លួនឯងពីកម្មករដែលទទួលបានប្រាក់ឈ្នួលតិចតូចពេលមកដល់សហរដ្ឋអាមេរិកដំបូងក្នុងឆ្នាំ ១៩៨០ រហូតក្លាយទៅជាថៅកែខ្លួនឯង។ សព្វថ្ងៃលោកជាម្ចាស់រោងចក្រស្លលោហធាតុមួយឈ្មោះថា TSB FOUNDRY ក្នុងក្រុង Salt Lake City នៃរដ្ឋ Utah ហើយគ្រប់គ្រងមុខជំនួញមួយចំនួនទៀតក្នុងរដ្ឋនោះផងដែរ។ លោកបានថ្លែងនៅក្នុងបទសម្ភាសន៍ជាមួយលោក សាយ មុន្នី នៃវីអូអេ ថា ជោគជ័យក្នុងមុខរបររបស់លោក បានមកពីការតស៊ូប្រឹងប្រែងធ្វើការដោយមិនខ្លាចនឿយហត់៕

គម្រោង YEP Academy បង្កើត និងដឹកនាំដោយក្រុមយុវជនចម្រុះដែលមានចំណង់ចំណូលចិត្តចំពោះធម្មជាតិ សកម្មភាពក្រៅ និងការពង្រឹងអំណាច នៅក្នុងការដឹកនាំ និងសម្របសម្រួលយុវជនក្នុងការចូលរួមសកម្មភាពនានានៅខាងក្រៅ និងបង្កើតផលវិជ្ជមានលើខ្លួនឯង សហគមន៍ និងបរិស្ថាន។ កញ្ញា លី ស៊ូហ៊ាង សហស្ថាបនិក YEP Academy លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកយកព័ត៌មានឱ្យវីអូអេថា YEP Academy ផ្តល់ឱកាសឱ្យយុវជនភ្ជាប់ទំនាក់ទំនងជាមួយធម្មជាតិ និងភាពជាខ្លួនឯង៕

កាលពីពេលថ្មីៗនេះ តុលាការខេត្តរតនគិរីបានចេញដីកាបង្គាប់ឲ្យចាប់ខ្លួនប្រធានគណបក្សជំនាន់ថ្មី លោក មាជ សុវណ្ណារ៉ា នៅក្នុងសំណុំរឿងដែលកើតឡើងមួយឆ្នាំមកហើយ។ នៅក្នុងបទសម្ភាសន៍ជាមួយវីអូអេ នាថ្ងៃទី៦ ខែកញ្ញា ឆ្នាំ ២០២៤ លោក មាជ សុវណ្ណារ៉ា អះអាងថា លោកកំពុងស្វះស្វែងចូលតតាំងក្តីនៅកម្ពុជា ទោះប្រឈមនឹងការចាប់ខ្លួនក៏ដោយ៕

ខណៈដែលពិភពលោកកំពុងប្រឈមនឹងបញ្ហាសេដ្ឋកិច្ច ព្រមទាំងវិបត្តិផ្សេងៗ ពលករកម្ពុជាដែលកំពុងចំណាកស្រុកធ្វើការនៅក្រៅប្រទេស ពិសេសប្រទេសថៃ ក៏កំពុងប្រឈមនឹងបញ្ហាការងារ ជាពិសេសបញ្ហាប្រឈមពីការធ្វើចំណាកស្រុកដោយមិនមានឯកសារ។ លោក លឹង សុផុន មន្ត្រីគម្រោងពលករចំណាកស្រុក និងជាក្រុមការងារមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា ក្នុងរយៈពេលជាងបីខែកន្លងទៅនេះ ពលករខ្មែរជាង ២០០នាក់ ត្រូវបានចាប់ខ្លួនដោយសារការធ្វើចំណាកស្រុកដោយមិនមានឯកសារ ខណៈដែលពលករខ្មែរជាច្រើនទៀតកំពុងប្រឈមនឹងការអត់មានការងារធ្វើនៅប្រទេសថៃ៕

លោក​ទីវ តារារិទ្ធ គឺជា​អ្នក​បង្កើត​មាតិកា​លើ​បណ្តាញ​សង្គម និង​ជាអ្នកជិះកង់​រៃអង្គាសប្រាក់​សម្រាប់​មន្ទីរពេទ្យ​គន្ធបុប្ផា និង​មន្ទីរពេទ្យកុមារអង្គរ។ លោក​បាន​ចាប់​ផ្តើម​ជិះកង់​ចាកចេញ​ពី​ប្រទេសកម្ពុជា​កាល​ពី​ដើម​ខែមិថុនា កាត់​តាម​បណ្តា​ប្រទេស​នៅ​តំបន់​អាស៊ី​មួយចំនួន ដើម្បី​ទៅ​កាន់​បណ្តា​ប្រទេស​នៅអឺរ៉ុប។ លោក ទីវ តារារិទ្ធ លើកឡើង​ក្នុង​បទ​សម្ភាសន៍​ជាមួយ​អ្នកនាង កាន់ វិច្ឆិកា អ្នកយកព័ត៌មាន​ឱ្យ​វីអូអេថា គម្រោង​ជិះកង់​ទៅកាន់​បណ្តា​ប្រទេសនៅ​អឺរ៉ុបនេះ នឹង​ត្រូវ​ចំណាយ​ពេល​មួយឆ្នាំ ដើម្បី​រៃអង្គាស​ប្រាក់​ឱ្យបាន​២៥​ម៉ឺន​ដុល្លារ​សម្រាប់​មន្ទីរពេទ្យ​ទាំង​ពីរ​។ ​សូមអស់​លោក​អ្នក​នាង​ស្តាប់​បទសម្ភាសន៍​នេះ​ទាំង​ស្រុងដូចតទៅ៕

ពលករកម្ពុជាដែលកំពុងធ្វើចំណាកស្រុកធ្វើការនៅក្រៅប្រទេសទាំងមានឯកសារ និងមិនមានឯកសារប្រមាណជាពីរលាននាក់។ ពួកគេមួយចំនួនដែលត្រឡប់មកកម្ពុជាវិញតែងប្រឈមនឹងផលលំបាកក្នុងការស្វែងរកការងារធញវើ ហើយខ្លះនាំយកបញ្ហាផ្លូវចិត្តមកជាមួយក៏បាន។ អ្នកស្រី កៅ សុគន្ធផារ៉ាឌី មន្រ្តីគម្រោងថ្នាក់ជាតិនៃអង្គការអន្តរជាតិទេសន្តរប្រវេសន៍ ហៅកាត់ថា IOM លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា អង្គការ IOM បានបង្កើត គម្រោងសហគ្រិនភាពសម្រាប់ពលករទេសន្តរប្រវេសន៍ដែលវិលត្រឡប់ ដើម្បីជួយកាត់បន្ថយភាពក្រីក្រតាមរយៈការបណ្តុះបណ្តាលពួកគេឱ្យចេះបង្កើតមុខរបរដោយខ្លួនឯង៕

នៅ​ឆ្នាំ​នេះ​គឺ​ជា​ខួប​លើក​ទី​៤៥​ដែល​ពលរដ្ឋ​កម្ពុជា​បាន​រត់ភៀសខ្លួន​ចេញ​ពី​មាតុភូមិ​ក្រោយ​ការដួល​រលំ​នៃ​របប​ខ្មែរ​ក្រហម​នៅ​ដើម​ឆ្នាំ​១៩៧៩។ ក្នុង​ឆ្នាំ​នេះ​ វីអូអេ​សំឡេង​សហរដ្ឋ​អាមេរិក​នឹង​សម្ភាស​អតីត​ជនភៀសខ្លួន​ខ្មែរ​ជាច្រើន​ដែល​បាន​មក​រស់​នៅ​សហរដ្ឋ​អាមេរិក​ដើម្បី​ឲ្យ​ពួកគេ​បង្ហាញ​ពី​ដំណើរ​ជីវិត​ដែល​នៅ​ឆ្ងាយ​ពី​មាតុភូមិ។ ជន​ភៀស​ខ្លួន​ម្នាក់​គឺ​លោក ឌិត​ ព្រន បាន​ប្រថុយ​ជីវិត​លួច​រត់​គេច​ចេញ​ពី​របប​ខោ​អាវ​ខ្មៅទៅ​កាន់​ព្រំដែន​ថៃ​នៅ​ឆ្នាំ​១៩៧៩ ហើយទី​បំផុត​ក៏​បាន​ជួបជុំ​ជាមួយ​ក្រុម​គ្រួសារ​ឡើង​វិញក្នុង​ទឹកដី​សហរដ្ឋ​អាមេរិក ​ក្នុង​អំឡុង​ទសវត្សរ៍​១៩៨០។ បទ​ពិសោធន៍​ដែល​លោក​បាន​ឆ្លង​កាត់​ក្នុង​របប​ខ្មែរ​ក្រហម ត្រូវ​បាន​ផលិត​ជា​ខ្សែ​ភាពយន្ត​ដ៏​ល្បីល្បាញ​រឿង​«វាលពិឃាត»ដែល​ទទួល​បាន​ពានរង្វាន់​អូស្កា​នៅ​ឆ្នាំ​១៩៨៥។   លោក សាយ មុន្នី នៃ​វីអូអេ បាន​សម្ភាសន៍​លោក ឌិត ទីតូនី បច្ចុប្បន្ន​អាយុ​៦០​ឆ្នាំ ដែល​ជា​អតីត​ជន​ភៀស​ខ្លួន​ខ្មែរ​និង​ជា​កូន​ប្រុស​ច្បង​របស់​លោក ឌិត​ ព្រន អតីត​អ្នក​សារព័ត៌មាន​ថត​រូប​ឲ្យ​កាសែត​ The New York Timesដូច​តទៅ៖

អំឡុងការដឹកនាំរបស់លោកនាយករដ្ឋមន្រ្តី ហ៊ុន ម៉ាណែត ដែលមានរយៈពេលជិតមួយឆ្នាំមកនេះ សកម្មជនបរិស្ថានរបស់ចលនាមាតាធម្មជាតិត្រូវបានអាជ្ញាធរចាប់ខ្លួនទាំងបង្ខំ ចំណែកមន្រ្តីការពារសិទ្ធិកម្មកររបស់អង្គការសង់ត្រាល់រងការប្តឹងផ្តល់ ស្របពេលដែលសកម្មជនសង្គម សកម្មជនគណបក្សប្រឆាំង និងថ្នាក់ដឹកនាំសហជីពមួយចំនួនដែលភាគច្រើនជាយុវជន កំពុងស្ថិតក្នុងពន្ធនាគារនៅឡើយ។ កញ្ញា លី ស្រីស្រស់ ប្រធានក្រុមអ្នកវិភាគវ័យក្មេង លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកយកព័ត៌មានឲ្យវីអូអេ ថា មេដឹកនាំរដ្ឋាភិបាលថ្មីគួរប្តូរពីការដឹកនាំបែបរឹតត្បិតមកជាការដឹកនាំបែបប្រជាធិបតេយ្យពេញលេញ ដើម្បីជំរុញឱ្យកម្ពុជាមានការអភិវឌ្ឍកាន់តែប្រសើរ និងមានសុខដុមរមនាសម្រាប់ប្រជាជន៕

កញ្ញា Parissa Lor-Tim គឺ​ជា​កូនខ្មែរ​អាមេរិកាំងដែល​បានកើត​ហើយ​និង​ធំ​ដឹង​ក្ដី​នៅ​ទីក្រុង​ឡុងប៊ិច រដ្ឋ​កាលីហ្វ័រញ៉ា សហរដ្ឋ​អាមេរិក។ កញ្ញា​គឺ​ជា​និស្សិត​ខ្មែរ​អាមេរិកាំងថ្នាក់​ឧត្តមសិក្សា​ជំនាន់​ទី​មួយ​នៅ​ក្នុង​គ្រួសារ​របស់​កញ្ញា។ ក្រុម​គ្រួសារ​របស់​កញ្ញា​គឺ​ជា​ជនភៀសខ្លួន​ខ្មែរ​ដែល​រស់រាន​មាន​ជីវិត​ពី​របប​ប្រល័យ​ពូជសាសន៍​ខ្មែរក្រហម។ បច្ចុប្បន្ន​នេះ កញ្ញា Parissa គឺ​ជា​និស្សិត​ឆ្នាំ​ទីពីរ​នៃ​សាកលវិទ្យាល័យ​ដ៏ល្បី​ University of California, Los Angeles (UCLA) សិក្សា​មុខជំនាញ​សង្គមវិទ្យា ដោយ​ផ្ដោត​លើ​ជំនាញ​វិទ្យាសាស្ត្រ​ទិន្នន័យ​និង​កិច្ចការ​សាធារណៈ។ កញ្ញា ឡាយ អានជូលីណា ដែល​ជា​និស្សិត​ចុះ​កម្មសិក្សា​នៅ​ VOA​ បាន​សម្ភាស​កញ្ញា Parissa Lor-Tim អំពី​ការ​តាំង​ចិត្ត​សិក្សា​នៅសាកលវិទ្យាល័យលំដាប់​កំពូល​មួយ​នេះ។ សូម​លោក​អ្នក​នាង​ស្ដាប់​បទសម្ភាសន៍​ជា​ភាសា​អង់គ្លេស​នេះ​ ដែល​ត្រូវ​បាន​ប្រែសម្រួល​ជា​ភាសាខ្មែរ​ដូច​ត​ទៅ៕

ចាប់តាំងពីដើមខែមិថុនាមក ស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែតបង្ហាញថា ពលករខ្មែរដែលកំពុងធ្វើការនៅក្រៅប្រទេសដោយមិនមានឯកសាររាប់រយនាក់ ត្រូវបានអាជ្ញាធរថៃចាប់បញ្ជូនមកកម្ពុជាវិញ។ ក្រៅពីការចាប់បញ្ជូនពលកររាប់រយនាក់មកកម្ពុជាវិញ ក៏ឃើញមានការផ្សាយរបស់សារព័ត៌មានថៃ The Nation ថាមានការចាប់ខ្លួនពលករខ្មែរប្រមាណជា៤ពាន់នាក់ ក្នុងអំឡុងការចាប់ខ្លនពលករបរទេសផ្សេងទៀតជាងពីរម៉ឺននាក់នៅប្រទេសថៃ។ លោក លឹង សុផុន មន្ត្រីគម្រោងពលករចំណាកស្រុក និងជាក្រុមការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងក្នុងបទសម្ភាសន៍ជាមួយអ្នកនាង កាន់ វិច្ឆិកា នៃវីអូអេថា រដ្ឋាភិបាលកម្ពុជាគួរសម្រួលការរៀបចំឯកសារដើម្បីឱ្យពលករទាំងនោះមានលទ្ធភាពធ្វើការស្របច្បាប់នៅប្រទេសថៃ៕

ខែមិថុនា គឺជា «ខែមោទនភាព» ឬហៅជាភាសាអង់គ្លេសថា “Pride Month” ដែលប្រារព្ធឡើងដើម្បីឧទ្ទិស និងរំឭកដល់មោទនភាពចំពោះអ្នកស្រឡាញ់ភេទដូចគ្នា (LGBTQ+)។ នៅកម្ពុជា អង្គការ និងសកម្មជនមួយចំនួនក៏បានប្រារព្ធខែមោទនភាពនេះផងដែរ។ យ៉ាងនេះក្តី ការរើសអើងអ្នកស្រលាញ់ភេទដូចគ្នា នៅតែជាបញ្ហាចោទនៅកម្ពុជា។ សុទ្ធ ពៅសំណាង សកម្មជនការពារសិទ្ធិសហគមន៍អ្នកស្រឡាញ់ភេទដូចគ្នា និងជាសមាជិកក្រុមប្រឹក្សាយោបល់យុវជននៃអង្គការសហប្រជាជាតិ (UNYAP) លើកឡើងនៅក្នុងបទសម្ភាសន៍ជាមួយអ្នកនាង កាន់ វិច្ឆិកា នៃវីអូអេ ថា ការបញ្ឈប់ការរើសអើងអ្នកស្រលាញ់ភេទដូចគ្នានៅកម្ពុជាអាចធ្វើទៅបាន លុះត្រាតែមន្រ្តីជាន់ខ្ពស់រដ្ឋាភិបាលចាប់ផ្តើមអនុវត្តការបញ្ឈប់ការរើសអើងជាមុន៕

អង្កការតាក់តែងគោលនយោបាយកម្ពុជា Future Forum ថា អាមេរិកទំនងចង់បានសមយុទ្ធរួមគ្នាជាមួយកម្ពុជាឡើងវិញ ក្នុងចំណោមកិច្ចសហប្រតិ្តបត្តិការផ្សេងៗទៀតជាមួយកម្ពុជា ក្រោយទស្សនកិច្ចរដ្ឋមន្ត្រីការពារជាតិអាមេរិកដែលបានបង្កើនការរីកចម្រើននៃទំនាក់ទំនងកិច្ចសហប្រតិបត្តិការឡើងវិញ។ លោក សុខ ខេមរា នៃ វីអូអេ បានធ្វើបទសម្ភាសន៍ជាមួយលោក អ៊ូ វីរៈ ប្រធានអង្គការអនាគតកម្ពុជា (Future Forum) តាមទូរសព្ទកាលពីថ្ងៃពុធ អំពីគោលនយោបាយសហរដ្ឋអាមេរិកចំពោះតំបន់ឥណ្ឌូបាស៊ីហ្វិកនិងកម្ពុជា៕

ខ្មែរអាមេរិកាំង​ ជា​ជន​ភៀសខ្លួន​ លោក សេក កុសល ជា​ប្រធាន​អង្គការ ​IKARE ​(អាយឃ៊ែ) ​បានថ្លែង​ពី​បេសកកម្ម​របស់​អង្គការ​ដែល​បាន​ជួយ​ដល់​ពលរដ្ឋ​ខ្មែរ​ជា​អតីត​យុទ្ធជន​ជាច្រើន​បាន​ទទួល​ ស្គាល់​ពី​សភា​និង​រដ្ឋាភិបាល​អាមេរិក​ក្នុង​តួនាទី​ជា​យុទ្ធមិត្ត​រួមអាវុធ​ក្នុង​សមូរភូមិ​ក្នុង​សង្គ្រាម​ស៊ីវិល​កាលពី​ជាង​៤០ឆ្នាំ​មុន។ ការ​តស៊ូមតិ​នេះ​ជា​កិច្ចការ​មួយ​ផ្នែក​ក្នុង​ចំណោម​ផែនការ​ច្រើន​ទៀត។ លោក សុខ ខេមរា ​នៃ វីអូអេ ​បាន​ជួប​សម្ភាសន៍​តាម​ទូរសព្ទ​ជាមួយ​លោក​ សេក កុសល ​ប្រធាន​អង្គការ IKARE ​ពីរដ្ឋ​មីនីសូតា​អំពី​កិច្ចការ​របស់លោក​និង​អំពី​ជីវិត​ជា​ជនភៀសខ្លួន​និង​ជាអ្នក​រួច​ជីវិត​សម័យ​ខ្មែរក្រហម។ សូម​ស្តាប់​កិច្ចសម្ភាសន៍​នេះ​ដូចតទៅ។

លោក យ័ប គឹម​ទឹង​ ពលរដ្ឋ​ខ្មែរ​អាមេរិកាំង​ដែល​ធ្លាប់​ឆ្លងកាត់​របប​ខ្មែរក្រហម​ហើយ​បានរត់​ភៀសខ្លួន​ចេញពី​របប​ខ្មែរ​ក្រហម​សម្លាប់រង្គាល​បាន​និយាយ​ថា​ការ​តស៊ូ​មតិ​ផ្នែក​សិទ្ធ​មនុស្ស​និង​លទ្ធិប្រជាធិបតេយ្យ​នៅ​សហរដ្ឋ​អាមេរិក​មាន​សារៈសំខាន់​នឹក​ស្មាន​មិនដល់​។​ លោក​ថ្លែង​យ៉ាង​ដូច្នេះ​ដោយ​យោង​ទៅលើ​ការ​ជួយ​គាំទ្រ​និង​ការ​បន្តការ​តស៊ូមតិ​ប្រឆាំង​នឹង​ការ​រំលោភ​សិទ្ធិមនុស្ស​និង​លទ្ធិប្រជាធិបតេយ្យ​នៅ​កម្ពុជា​និង​ការ​តស៊ូ​មតិ​ជាមួយ​សភា​និង​រដ្ឋាភិបាល​អាមេរិកាំង​ និង​ ការ​គាំទ្រ​រួមគ្នា​ពី​សហគមន៍​ខ្មែរ​នៅ​សហរដ្ឋ​អាមេរិក​និង​ប្រទេស​ជាច្រើន​ទៀត។ លោក​ សុខ ខេមរា ​នៃ វីអូអេ ​បាន​ជួប​សម្ភាសន៍​លោក យ័ប គឹមទឹង ​ប្រធាន​អង្គការ ​ខ្មែរ​អាមេរិកាំង​ដើម្បី​សិទ្ធិមនុស្ស​និង​ប្រជាធិបតេយ្យ ​(CAHRAD) នៅ​រដ្ឋ​វីជីនៀ ​សហរដ្ឋ​អាមេរិក។ សូម​ស្តាប់​កិច្ច​សម្ភាសន៍​នេះ​ដូច​តទៅ៖

ក្រោយ៤៩ឆ្នាំដែលរងគ្រោះដោយសាររបបខ្មែរក្រហម លោក Bryant Ben បានចែករំលែកបទពិសោធន៍ដ៏សោកសៅនិងការតស៊ូរបស់លោកក្នុងជីវិតថ្មីនៅលើទឹកដីសហរដ្ឋអាមេរិកក្រោយភៀសខ្លួនមកដល់។ លោក សុខ ខេមរា នៃ វីអូអេ បានជួបសម្ភាសន៍លោក Bryant តាមទូរសព្ទពីទីក្រុងឡងប៊ិច (Long Beach) រដ្ឋកាលីហ្វ័ញ៉ា។ លោក Bryant ធ្លាប់ជាជនរងគ្រោះដាក់ពាក្យប្តឹងនៅឯតុលាការកាត់ទោសខ្មែរក្រហមដែលចូលរួមដោយអង្គការសហប្រជាជាតិផងដែរ។ សូមស្តាប់កិច្ចសម្ភាសន៍វគ្គខ្លីដំបូងដូចតទៅ៕

ក្រុមសៀក «ហ្វា» មកពីទីក្រុងសៀមរាបប្រទេសកម្ពុជាបា នធ្វើការសម្តែងសៀកដែលមានចំណងថា «មាសស» នៅក្នុងមហោស្រពមួយក្នុងទីក្រុងញូវយ៉ក សហរដ្ឋអាមេរិក។ មានរយៈពេលមួយម៉ោង «មាសស» បានបង្ហាញពីសារសំខាន់របស់គ្រាប់អង្ករដែលជាអាហារដ៏ចាំចាច់ប្រចាំថ្ងៃរបស់ប្រជាជនកម្ពុជា។ ការសម្តែង «មាសស» នេះ ក៏បានទាក់ទាញចំនាប់អារម្មណ៍របស់់ទស្សនិកជន ទៅលើសាសនា ប្រពៃណីរបស់កម្ពុជា និងឧបករណ៍ភ្លេងខ្មែរដូចជារនាថឯក ពិណ ស្គរដៃ ទ្រ និងខ្លុយខ្មែរជាដើមដែលត្រូវបានប្រគុំផ្ទាល់នៅក្នុងការសម្តែងនោះ។ កញ្ញា ទុំ ម្លិះ នៃវីអូអេបានធ្វើការសម្ភាសន៍ជាមួយលោក នង ចន្ថា អ្នកនិពន្ធភ្លេង សម្រាប់ការសម្តែងសៀក«មាសស» នៅទីក្រុងញូវយ៉ក៕

សន្និសីទភាគីទៅកាន់អនុសញ្ញាក្របខណ្ឌអង្គការសហប្រជាជាតិស្តីពីការប្រែប្រួលអាកាសធាតុ (UNFCCC) លើកទី២៨ ឬហៅថា COP28 កំពុងប្រព្រឹត្តទៅចាប់ពីថ្ងៃទី៣០ ខែវិច្ឆិកា រហូតដល់ថ្ងៃទី១២ ខែធ្នូ ឆ្នាំ២០២៣ នៅទីក្រុងឌូបៃ ប្រទេសអេមីរ៉ាតអារ៉ាប់រួម ដើម្បីជជែក និងយល់ព្រមលើមធ្យោបាយដោះស្រាយវិបត្តិអាកាសធាតុ។ យុវជនកម្ពុជាដែលកំពុងចូលរួមក្នុងសន្និសីទនេះបានចែករំលែកបទពិសោធន៍ និងចង់ឃើញគ្រប់ភាគីពាក់ព័ន្ធទាំងអស់សហការជាមួយមេដឹកនាំពិភពលោករួមគ្នាទប់ស្កាត់ការប្រែប្រួលអាកាសធាតុ។ អ្នកនាង កាន់ វិច្ឆិកា នៃវីអូអេ បានសម្ភាសន៍កញ្ញា ហ៊ង សុជាតា ប្រតិភូយុវជនផ្នែកអាកាសធាតុពីកម្ពុជាដែលកំពុងចូលរួមសន្និសីទស្តីពីការប្រែប្រួលអាកាសធាតុលើកទី២៨ ឬហៅថា COP28 អំពីក្តីរំពឹងរបស់យុវជនពីភាគីពាក់ព័ន្ធនិងមេដឹកនាំពិភពលោកក្នុងការទប់ស្កាត់ការប្រែប្រួល៕ (បទសម្ភាសន៍នេះត្រូវបានផលិតឡើងជាផ្នែកមួយនៃភាពជាដៃគូប្រព័ន្ធផ្សព្វផ្សាយពាក់ព័ន្ធនឹងការប្រែប្រួលអាកាសធាតុឆ្នាំ២០២៣ ដែលជាអាហារូបករណ៍ផ្នែកសារព័ត៌មានរៀបចំដោយ Earth Journalism Network របស់អង្គការ Internews និងមជ្ឈមណ្ឌល Stanley សម្រាប់សន្តិភាព និងសន្តិសុខ។)

បម្រែបម្រួលអាកាសធាតុកំពុងជាបញ្ហាចោទរបស់ពិភពលោក និងកម្ពុជា។ របាយការណ៍របស់អង្គការយូនីសេហ្វ ចេញកាលពីឆ្នាំ២០២១ បង្ហាញថា មនុស្សវ័យក្មេងដែលរស់នៅក្នុងប្រទេសកម្ពុជា ស្ថិតក្នុងចំណោមក្រុមដែលប្រឈមនឹងហានិភ័យខ្ពស់ពីផលប៉ះពាល់នៃការប្រែប្រួលអាកាសធាតុ ដែលបង្កការគំរាមកំហែងដល់សុខភាព ការអប់រំ និងការទទួលបានការការពារ។ យុវជនមកពីកម្ពុជាចំនួនមួយចំនួនបាននិងកំពុងចូលរួមសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិ ឬហៅថា COP28 ដែលធ្វើឡើងក្នុងទីក្រុងឌូបៃ ប្រទេសអេមីរ៉ាតអារ៉ាប់រួម ចាប់ពីថ្ងៃទី៣០ ខែវិច្ឆិកា ដល់ថ្ងៃទី១២ ខែធ្នូ ២០២៣។ អ្នកនាង កាន់ វិច្ឆិកា នៃវីអូអេ បានសម្ភាសន៍កញ្ញា អ៊ុត ច័ន្ទតារាពេជ្រ អ្នករៀបចំកម្មវិធី«សន្និសីទយុវជនក្នុងស្រុក» ប្រទេសកម្ពុជា ឆ្នាំ២០២៣ អំពីព័ត៌មានលម្អិតពាក់ព័ន្ធនឹងការចូលរួមសន្និសីទស្តីពីការប្រែប្រួលអាកាសធាតុ និងការប្តេជ្ញាចិត្តរបស់យុវជនក្នុងបន្តសកម្មភាពទប់ស្កាត់ការប្រែប្រួលអាកាសធាតុដើម្បីចីរភាព៕ (បទសម្ភាសន៍នេះត្រូវបានផលិតឡើងជាផ្នែកមួយនៃភាពជាដៃគូប្រព័ន្ធផ្សព្វផ្សាយពាក់ព័ន្ធនឹងការប្រែប្រួលអាកាសធាតុឆ្នាំ២០២៣ ដែលជាអាហារូបករណ៍ផ្នែកសារព័ត៌មានរៀបចំដោយ Earth Journalism Network របស់អង្គការ Internews និងមជ្ឈមណ្ឌល Stanley សម្រាប់សន្តិភាព និងសន្តិសុខ។)