Wiriwe Maine

Abanyamulenge baturutse mu ma Reta agera kuri 38 muri Amerika bakondoreye i Washington D.C. ku murwa mukuru wa politike wa Amerika baja kwiyamiriza amabi ababo bakorerwa mu misozi miremire mu ntara ya Kivu y-ubumanuko mu buseruko bwa Republika iharanira demokarasi ya Kongo. Mubaroye D.C. harimwo abaturutse aha muri Maine 236. Iryo koraniro ryari ryahamagawe n-ishirahamwe Mahoro Peace Association. Richard Munyentwari, aheruka gutanga mu mabanga yo guserukira iryo shirahamwe muri Maine akaba yari ahagarariye ibikorwa vy'itsinda ryari rijejwe umutekano kuwa 20 ukwezi kwa kane mu gihe abarenga 3000 bigaragamvya mu mabarabara ya Washington, yaganiriye na Eloge Willy Kaneza muri kino kiganiro maze atwiganira impamvu iyi myiyerekano yatunganijwe, icisiguye hamwe n'umuti abona w'ibibazo vyugarije Abanyamulenge muri Sud-Kivu. 

Kaze mu kiganiro " Wiriwe Maine" co kuri uyu wa Mungu igenekerezo rya 5 ukwezi kwa 4 umwaka wa 2026. Muri kino kiganiro, umutumire ni Enathe Muhawenimana. Ni umunyeshure wo muri kaminuza ya " Bates College" mu muji wa Lewiston wo muri Reta ya Maine, mu buraruko bwa Amerika. Uwo mwigeme n'abandi banyeshure uyu mwaka bateguye ibikorwa vyo kwibuka ku ncuro ya 32 jenoside yakorewe Abatutsi mu Rwanda. Aratwiganira icabateye gutunganya ico gikorwa, ubutumwa bagenera abanyamahanga eka n-abanyarwanda cane cane urwaruka ,hatibagiwe abagifise ingengabitekerezo ya jenoside. Bane natwe muri kino kiganiro mutegurirwa na Eloge Willy Kaneza. 

Mu kiganiro Wiriwe Maine co kuri uyu w-Imana itariki ya 15 ukwezi kwa gatatu umwaka wa 2026 tugaruka ku musi mukuru wahariwe ubwigenge bw'abagore cake abakenyezi. Ni umusi mukuru wateguwe n'sihirahamwe ry-Abakenyezi b-Abarundikazi baba muri Leta ya Maine mu buraruko bwa Leta zunze ubumwe za Amerika. Muri kino kiganiro tugaruka kuvyaranze uwo musi hamwe na bimwe mu vyo abagore baganirije Amjambo Africa bashikirije. Mu gihe ukwezi kwa gatatu kose kwitirirwa ukw-Abagore, tubifurije ibihe vyiza mu ngo , mu tuzi, mu miryango no mu kibano. Iki kiganiro mukigezwaho na jewe Eloge Willy Kaneza.

Kaze mu kiganiro Wiriwe Maine co kuri uyu w'Imana igenekerezo rya 22 ukwezi kwa kabiri. Tuvuga ku nkunga itangwa n'ishirahamwe ProsperityME ikaronswa abantu ku giti cabo canke imiryango yagize ibibazo vyo kubura amafaranga yo gukota amazu bitewe n'ibikorwa vy'igipolisi kizwi nka ICE kijejwe ibibazo vy-abimukira .Ico Gipolisi mukwa mbere cafashe abantu bagera kuri 200 muri Leta ya Maine, ivyatumye abenshi batinya kuja ku tuzi  bisanga nta bushobozi bwo kuriha amazu bagifise. Muri kino kiganiro, Claude Rwaganje yashinze ProsperityME akaba n'umuyobozi nshingwabikorwa waryo aratwiganira amafaranga atangwa ingunga imwe akaba ari amadolari ya Amerika 300 hamwe n'ibisabwa kugira umuntu yemererwe.

Kaze mu kiganiro  Wiriwe Maine co kuri uyu w'Imana igenekerezo rya 11 ukwezi kwa mbere umwaka wa 2026 akaba ari naco kiganiro ca mbere ca Wiriwe Maine cuguruye uyu mwaka. Tugaruka kw'ishimutwa rya  Nicolás Maduro , umukuru w'iihugu ca Venezuela n’umugore we, Cilia Flores. Muri kino kiganiro tubumvisha ico iri shimutwa risobanuye, ingaruka ku migenderanire hagati y'ibihugu vya rutura no ku baturiye isi bose hamwe rero n'ico abantu bokwitega mu misi iri imbere. Umuhinga twaganiriye ni Jean Hakuzimana, ahagarariye umushinga wo gutuza abimukira muri Reta ya New Hampshire, yo muri New England, mu majyaruguru y’iburasirazuba bwa Leta Zunze Ubumwe za Amerika. Iki kiganiro mwagiteguriwe mwongera mukigezwaho na Eloge Willy Kaneza

Mu gihe Leta zunze ubumwe za Amerika zikomeje kwagiriza u Rwanda gufasha no gushigikira muvya gisirikare hamwe na politike umurwi wa M23 urwanira mu buseruko bwa Republika iharanira demokarasi ya Kongo, uwo muhari nawo ubandanya kwigarurira uduce dutandukanye harimwo utwimbukamwo ubutare bwinshi mbere bunakoreshwa cane na Amerika ubwayo mu buhinga bwa none. Ivyo bikaba mu gihe Uburundi n'u Rwanda vyagirizanya ugusotorana hamwe n'ukutubahiriza amasezerano yasinyiwe i Washington kuwa 4 ukwa 12 uyu mwaka. Muri kino kiganiro twatumiye umumenyeshamakuru Pierre Claver Niyonkuru akorera Amjambo Afrika akaba amaze imyaka irenga 12 akorera ku bibazo vya Afrika y'ibiyaga binini , amakambi y'impunzi, akaba ari no mw'ishirahamwe ry'abamenyeshamakuru bakora ku bibazo vy'ubutungane bw'inyuma y'intambara. 

Ishirahamwe " Mahoro Peace Association" rifise icicaro muri Amerika rikaba rigizwe n'abava mu bwoko bw'Abanyamulenge rimaze imisi ritunganya muri uku kwezi kwa 11 imyiyerekano izokomeza mukwa 12 mu miji n'ama reta bitandukanye muri Leta zunze ubumwe za Amerika. Iyo myiyerekano ni iyo kwiyamiriza ico uwo muryango wita " ihonyabwoko n'agatotezo bikorwa n'igisirikare c'Uburundi FDNB" ku Banyamulenge bari i Mulenge muri Kivu y'Ubumanuko mu buseruko bwa Kongo. Muri ako gace, Uburundi bwarungitseyo ingabo zirenga 10.000 kuja gufashanya n'igisirikare ca Kongo, FARDC, hamwe n'imirwi y'inyeshamba ishigikiwe na Reta- mu rugamba rwo kurwanya umuhari wa M23 umaze kwigarurira imirwa mikuru ya Goma muri Kivu y-Uburaruko na Bukavu muri Kivu y-Ubumanuko hamwe n'utundi duce tutari duke twimbukamwo inzahabu nyinshi. Kinshasa yagiriza Kigali gufasha abaroberi ba M23, ariko Kigali ivuga ko ari ibinyoma vyambaye ubusa ahubwo yashizeho ingamba zo kwikingira ibitero vy'interahamwe za FDLR zagirizwa kuba zarakoze ihonyabwoko ryakorewe Abatutsi muri 1994 mu Rwanda. Umuvugizi w-igisirikare c'Uburundi , Général de brigade  Gaspard Baratuza aremeza ko hari uduce tumwe tumwe Abanyamulenge bankirwa kuva mu mihana yabo agasigura ko bakorana n-umwansi. Muri kino kiganiro Wiriwe Maine yakiriye Douglas Gasore Kabunda, umukuru w'umuryango " Mahoro Peace Association".

Kaze mu Kiganiro " Wiriiwe Maine" co kuri uyu w-Imana itariki ya 9 ukwezi kwa 11 umwaka wa 2025. Twabazaniye Umunyarwandakazi Kevine Umutesi akora ibijanye n'ubwiza. Aratubwira ukuntu yakujije impano yiwe n'uko akorera abamugana. Ku bwiwe, ugutaka abakenyezi n'abakobwa canke kubakorera " maquillage" ni ikimenyetso co kwikunda kandi abantu barabikeneye. Mugumane natwe. Tunabafitiye amakuru y'ingenzi yo muri iyi misi kw'isi dushikirizwa na mugenzi wacu Pierre Claver Niyonkuru. Iki kiganiro mugishikirizwa na Eloge -Willy Kaneza.

Kaze mu kiganiro wiriwe Maine co kuri uyu w'Imana. Tugaruka ku mutwe wa FDLR ukomeje gutuma imigenderanire hagati y'ibihugu bitatu vy'akarere ka Afrika y'ibiyaga binini -Uburundi-u Rwanda na Congo itosekara. Ingabo za Congo, FARDC, zasohoye itangazo kuwa 10 ukwezi kwa cumi umwaka wa 2025 zisaba inyeshamba za FDLR gushira hasi ibirwanisho zikishikana ku butegetsi bw'u Rwanda canke ku ngabo za ONU muri RDC-MONUSCO. Umutumire wacu ni umwigisha muri kaminuza akaba n'umuhinga mu bijanye n'imigenderanire hagati y'ibihugu Ismael Buchanan. Iki kiganiro mugishikirizwa na Eloge-Willy Kaneza. Mwakoze mwebwe mwese mwakurikiranye kino kiganiro, ni ah'ubutaha.

Kaze mu kiganiro " Wiriwe Maine" co kuri uyu w'Imana. Tugaruka kw'iteka ingoma z'Uburundi ziserukiwe n'umurwi wa " Batimbo United" zatewe zishirwa mu murage ndangakaranga w'umuji wa Portland. Ni umurwa mukuru w'ubutunzi wa Leta ya Maine mu buraruko bwa Amerika. Muri kino kiganiro, Yves Karubu atwara uwo murwi aratubwira ico bisiguye hamwe n'imigambi we na begenzi be bafise muri kazoza. 

Kaze mu kiganiro "Wiriwe Maine" co kuri uyu w'Imana. Tugaruka ku bwicanyi bwakorewe Abanyamulenge bari bahungiye mu Burundi muri 2004. Ku isi yose, ku ncuro ya 21 Abanyamulenge, amashirahamwe aharanira agateka ka zina muntu hamwe n'ayaharanira inyungu z'Abatutsi muri rusangi baributse muri uku kwezi kwa munani. Baracasaba ubutungane kandi biyemeje ko batazahemuka badatunganirijwe. 

Godeberthe Hakizimana, umukenyezi w’umumenyeshamakuru Jean Bigirimana w’Umurundi yanyurujwe mu mwaka wa 2016, n’ubu aracasaba ubutungane n’ukuri kuvyashikiye umugabo wiwe. Amjambo Africa yamusanze mu muji wa Kigali ku murwa mukuru w’u Rwanda aho yahungiye. Yayibwiye ko n’ubu atazohumeka gusaba ubutungane bw-Uburundi gukora amatohoza yigenga kugira ukuri kumenyekane kuvyashikiye umunega wiwe. Abantu n’imiryango babuze ababo, abahohotewe, abo ababo banyurujwe, canke baburiwe irengero-umupfasoni Hakizimana abasaba kudacika intege akabahamagarira kwiyubaka. 

Wiriwe Maine – Ikiganiro kuri Gloriose Karumuna, Umucuruza w’Umurundikazi muri Leta ya Maine Murakaza neza muri "Wiriwe Maine", ikiganiro kibazanira intahe, ubuhamya, n’akaranga k’abimukira baba mu buraruko bwa Leta Zunze Ubumwe za Amerika, cane cane muri Maine ariko tutibagiye n’ahandi ku isi.Muri kino gice, turaganira na Gloriose Karumuna, umukenyezi w’Umurundikazi amaze imyaka irenga 10 aba i Portland, Maine. Aratubwira icamutumye kwugurura Glory Store LLC, ubucuruzi bw’ibifungurwa biva mu bihugu vy’Afurika, n’ukuntu ashira imbere akaranga n’umuco w’iwabo.Gloriose aturuka i Kiganda, hagati mu Burundi, aho hahoze himikirwa abami, akaba n’umwe mu bakenyezi bake b’inkerebutsi bagize urwego rw’Abashingantahe. Aratubwira kandi uko abonye uruhara rw’uwo muco mu buzima bwo mu mahanga, hamwe n’ukuntu akaranga gashobora gufasha imiryango kuguma ihagaze neza, abana ntibatakaze imizi.🎙️ Ntimuce iruhande!

Umurwi witiriwe Team 257 Maine-USA warakiriye mugenzi wawo wa FBM (Fraternité Burundaise de Montréal) wo muri  Canada mu rukino rwo kwishura. Ni ama ekipe ya Basketball. Irushanwa ryabereye  mu nzu y’imikino ku wa gatandatu igenekerezo rya 17 Rusama 2025, guhera isaha icenda z’umuhingamo (isaha yo muri Maine), ku kibuga ca Riverton Community Center mu muji  wa Portland, Maine. Umukino warangiye Team 257 Maine-USA itsinze ku manota 74 kuri 52 y'abashitsi baje baturutse mu gihugu kibanyi ca Canada. Abateguye uru rukino bavuga ko inkino ziri mu bintu bituma Abarundi batibagira i wabo, bagumana amagara meza kandi bakomeza n'umuco ubaranga. 

Godeberthe Hakizimana, umukenyezi w’umumenyeshamakuru Jean Bigirimana w’Umurundi yanyurujwe mu mwaka wa 2016, n’ubu aracasaba ubutungane n’ukuri kuvyashikiye umugabo wiwe. Amjambo Africa yamusanze mu muji wa Kigali ku murwa mukuru w’u Rwanda aho yahungiye. Yayibwiye ko n’ubu atazohumeka gusaba ubutungane bw-Uburundi gukora amatohoza yigenga kugira ukuri kumenyekane kuvyashikiye umunega wiwe. Abantu n’imiryango babuze ababo, abahohotewe, abo ababo banyurujwe, canke baburiwe irengero-umupfasoni Hakizimana abasaba kudacika intege akabahamagarira kwiyubaka. 

Marguerite Barankitse: Umumarayika w’i Burundi, “MERE TEREZA WO MURI AFRIKA” agumana icizere c’akazozaMarguerite Barankitse, azwi nk’Umumarayika w’i Burundi canke Mère Teresa wa Afrika, ni umukenyezi azwi cane mu bikorwa vy’imbabazi no gutabara abatishoboye muri Afrika. Yavutse mu 1957 mu ntara ya  Ruyigi, mu buseruko bw’u Burundi. Uwo mugore w’umu Kristu akomoka mu bwoko bw’Abatutsi yahariye ubuzima bwiwe gukingira abana bagizweko ingaruka n’intambara zishingiye ku bwoko n’ivyiyumviro vya poritike mu gihugu ciwe.Mu 1993, igihe Uburundi bwadukamwo  intambara n’ubwicanyi vyakurikiye iyicwa rya Perezida Melchior Ndadaye, Umuhutu wa mbere yaratowe mu kibanza c’umukuru w’igihugu akicwa inyuma y’amezi atatu gusa atwara, umukenyezi Barankitse  yabonye n’amaso yiwe ubwicanyi bwabereye muri diyoseze ya Ruyigi. Yabashije gukiza abana 25 bari bagiye gupfa. Ico gikorwa catanguje Maison Shalom, ikimenyetso c’amahoro no kwiyunga. Mu myaka yose yakurikiye, ico kigo caritayeho, caravuye kandi carigishije abana barenga 47.000, ata gutandukanya ubwoko. Amashure, amavuriro, amazu, n’amashirahamwe yo kwigisha kwiziganiriza vyarubatswe biciye ku buyobozi bwiwe.Kubera ibikorwa vyiwe vy’akaroruhore, yarashimiwe n’ibigo mpuzamakungu bitandukanye, harimwo ibi bihembo bikomeye:Agashimwe k’Uburenganzira bwa muntu (Ubufaransa, 1998)Agashimwe k’Amajepfo n’Amajyaruguru k’Inama y’Uburayi (2000)Agashimwe k’Abana bo kw’isi yose (2003)Agashimwe ka Nansen k’impunzi (HCR, 2005)Agashimwe ka Opus (2008)Agashimwe k’ukurwanya amakimbirane – Fondasiyo Chirac (2011)Agashimwe k’Aurora ko Gukangura Ubumuntu (2016)Mu 2015, amaze kunegura ikiringo ca gatatu ca Perezida Pierre Nkurunziza, yaciye ahungira hanze. Mu Rwanda ahaba, yagumije ibikorwa vyiwe, ashinga Ikigo c’Umuryango w’Amahoro i Kigali – ahakirirwa, higishirizwamwo kandi havurirwamwo impunzi z’Abarundi.Vyongeye, yatanguje Fondasiyo Marguerite Barankitse, igamije guteza imbere impunzi no gushigikira imigambi y’amahoro, ubutungane n’iterambere rirama.Naho hari itegeko mpuzamakungu ryatanzwe ngo atabwe muri yompi n’ubutungane bw’i Burundi, ntivyigeze bimutera ubwoba canke ngo bimuce intege mu migambi n’imigabo vyiwe. Marguerite Barankitse ni ishusho y’icizere ku bantu bariko barababara, kandi ni n’igicapo c’urukundo, ubutungane, ubuntu  n’icubahiro muri kubu na kazoza.